Chelsea ប៉ះ Man City វគ្គផ្ដាច់ព្រ័ត្រ UCL ក្រោយទម្លាក់ Real
ថ្ងៃចេញផ្សាយៈ May 8, 2021
អឺរ៉ុប ៖ ក្រុមតោខៀវ Chelsea បានឡើងទៅប៉ះ Manchester City ក្នុងវគ្គផ្ដាច់ព្រ័ត្រពាន UEFA Champions League រដូវកាលឆ្នាំ២០២០-២០២១ ក្រោយយក ឈ្នះ Real Madrid ២-០ បញ្ចប់ជើងទី២ នៃវគ្គ ៤ក្រុមចុងក្រោយ នៅពេលដែលពួកគេលេងស្មើគ្នា ១-១ កាលពីជើងទី១។
កីឡាករខ្សែប្រយុទ្ធដែលតែងតែត្រូវបានគេរិះគន់ថាខ្សត់គ្រាប់បាល់ Timo Werner ជាអ្នកតែតគ្រាប់ទី១ នៅនាទី២៨ នៅមុនពេល Christian Pulisic បញ្ជូនឲ្យ Mason Mount ស៊ុតគ្រាប់ទី២ នៅនាទី៨៥ ធ្វើឲ្យក្រុមរបស់លោក Thomas Tuchel ស័ក្តិសមឡើងទៅប៉ះក្រុមឈរនៅកំពូលតារាង Premier League បច្ចុប្បន្ន Manchester City ក្រោយការទន្ទឹងរង់ចាំអស់រយៈពេល ៩ឆ្នាំ។
នេះក៏ជាលើកទី២ ក្នុងរយៈពេល ២រដូវកាលជាប់គ្នាផងដែរសម្រាប់អ្នកចាត់ការទូទៅសញ្ជាតិអាល្លឺម៉ង់ Tuchel ដែលនឹងដឹកនាំក្រុមលេង Final នៃពានអឺរ៉ុប UCL ក្រោយពេលដឹកនាំ PSG ចាញ់ Bayern Munich ១-០ កាលឆ្នាំ២០២០។
សូមជម្រានថា ជំនួបវគ្គផ្ដាច់ព្រ័ត្ររវាង Chelsea និង Man City នឹងធ្វើឡើងនៅថ្ងៃទី២៩ ខែឧសភា ឆ្នាំ២០២១ នាទីក្រុង Istanbul ប្រទេសតួកគី៕