កម្ពុជា គ្រោងបញ្ជូនអត្តពលិក១២ប្រភេទកីឡា ទៅហ្វឹកហាត់នៅចិន ត្រៀមស៊ីហ្គេម
ភ្នំពេញ ៖ ឯកឧត្តម វ៉ាត់ ចំរើន អគ្គលេខាធិការគណៈកម្មធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានលើកឡើងថា កម្ពុជាគ្រោងបញ្ជូនកីឡាករ-កីឡាការិនី សក្តានុពលរបស់ខ្លួនចំនួន ១២ប្រភេទកីឡា មានចំនួន ១៣៥នាក់ ចេញទៅបន្តការហ្វឹកហាត់នៅសាធារណរដ្ឋប្រជាមានិតចិន ដើម្បីត្រៀមស៊ីហ្គេម លើកទី៣១ ឆ្នាំ២០២១ នៅប្រទេសវៀតណាម និងស៊ីហ្គេម លើកទី៣២ ឆ្នាំ២០២៣ នៅកម្ពុជា។
ឯកឧត្តមចាត់ទុកថា ការហ្វឹកហាត់នៅប្រទេសចិន នឹងជួយជំរុញឲ្យថាមពលកម្លាំង និងស្ថេរភាពបច្ចេកទេសកាន់តែល្អប្រសើរ ដើម្បីត្រៀមចូលរួមប្រកួតប្រជែងមេដាយស៊ីហ្គេម នៅវៀតណាម ចុងឆ្នាំ២០២១ នេះផង ហើយក្រោយបញ្ចប់ការប្រកួតក្រុមជម្រើសជាតិទាំងនោះ នឹងចេញទៅបន្តការហ្វឹកហាត់រយៈពេលវែង រហូតដល់ពេលដែលត្រូវធ្វើម្ចាស់ផ្ទះស៊ីហ្គម ឆ្នាំ២០២៣ តែម្តង។ យ៉ាងណាមិញ ចំពោះប្រភេទកីឡាទាំង ១២នោះ មានប្រភេទកីឡាអ្វីខ្លះនោះ ពុំទាន់ត្រូវបានបញ្ជាក់ឲ្យដឹងនៅឡើយនោះទេ៕